RF nezareti astında olğan Qırımnıñ Lenino rayon mahkemesi yerli sakinler Lenur Halilov ve Dmitriy Kamışantsevge Rusiye ordusını "itibardan tüşürüv" içün 40 biñ ruble para cezasını tayin etti. Bunı mahkemeniñ matbuat hızmeti haber etti.
Tahqiqatnıñ versiyasına köre, erkeklerge qarşı dava açılmasına sebep adam çoq olğan yerde "Hayırlı aqşamlar, biz Ukrayinadanmız" türküsini diñlegenleri olğan.
Mahkemeniñ fikrince, bu türküniñ adı "Rusiye Federatsiyası Silâlı Quvetleriniñ itibarını ve oña işançnı sarsıtmaq içün yapılğan materiallarda" qullanğan "arbiy-vatanperver bir şiardır". Bu türküni diñlegen Halilov ve Kamışantsev "mahsus operatsiyanıñ keçirilmesine qarşılıq kösterdiler", dep sayalar mahkemede.
Matbuat hızmetinde qayd etkenleri kibi, erkekler qabaatını tanığanlar.
"Hayırlı aqşamlar, biz Ukrayinadanmız" eki ukrayin diceyi ProBass (Artem Tkaçenko) ve Hardi-niñ (Maksim Mokrenko) kompozitsiyasıdır. Bu türkü pek meşur Rusiye Ukrayinağa büyük cenkni başlatqan soñ oldı.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
