Koronavirus sebebinden közetüv altında bulunğan qırımlılarnıñ sayısı 2,2 biñden çoq oldı. Bu aqta Qırımnıñ Rusiye sağlıq naziri İgor Çemodanov Qırımda koronavirus tarqaluvına qarşı tedbirler maruzası vaqtında ayttı.
«2230 insan közetüv altında buluna. 2169 insan dinamik közetüv altında qala. İnsanlarnıñ sayısı arta. Amma mında belli etüv de arta2, – dep qayd etti o.
Onıñ aytqanına köre, diagnozı qayd etilgen qırımlılarnıñ alı «belli bir telüke» taşımay.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda martnıñ 27-nde saba yedi yañı koronavirus hastası qayd etildi. Böylece hastalanğanlarnıñ sayısı 14 oldı.
Berilgen malümatqa köre, Qırımda koronavirus vaziyeti eyileşkenine qadar ekimler qabul etmeycek ve ameliyatlar yapılmaycaq.
Qırımda yedi koronavirus hastası resmiy şekilde tasdıqlandı. 1500 insan ekimlerniñ közetüvi altında buluna. Aqyarda COVID-19 telükesi sebebinden 1767 insan közetüv altında edi.
Moskva kontrolindeki Qırım yolbaşçısı Sergey Aksenov, koronavirus tarqalğan memleketlerge barıp, bunı gizlegen insanlarğa qarşı cinaiy dava açılmasını talap etmege azır. O, yarımadağa Herson vilâyetiniñ memuriy sıñırından kirgen qırımlılar üzerinde monitoringni quvetleştirmege talap etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
