RF tarafından apis cezasına mahküm etilgen Qırımtatar Milliy Meclisi reisiniñ muavini Nariman Celâl Rusiyeniñ Krasnoyarsk bölgesindeki Minusinsk apishanesine etap etilgen. Bunı ondan mektüp alğan apayı Leviza Celâlov haber etti.
Nariman Minusinsk apishanesiye noyabrniñ 20-ned kelip çıqqan, bundan soñ onı karantinge yollağanlar. Mektüpte o etap vaqtında sağlığı ile çekişkeni yaza.
Leviza Celâlova er kesni aqayına destek mektüplerini yazmağa çağıra.
"Elimizden kelgeni - oña mektüpler yazmaqtır. Böylece biz oña destek bildire ve yardım ete bilemiz. Mektüpni postanen yollamaq mümkün (2-3 afta ketecek) ya da F-mektüp servisi vastasınen yollamaq", - dep yazdı o.
Evel onıñ apayı Leviza Celâlova Rusiyeniñ Krasnoyarsk bölgesindeki Minusinsk apishanesine etap etilmesi beklengen Nariman Celâlnıñ qayda olğanı alâ daa belli olmağanını haber etken edi.
Evel Avropa Birliginiñ Ukrayinadaki temsilciligi Rusiye tarafından apis cezasına mahküm etilgen qırımtatar Nariman Celâlnıñ sağlıq alından ve haberlerniñ olmamasından raatsız olğanını bildirgen edi.
Oktâbrniñ 2-nde Nariman Celâl ve ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
