Soñki eki afta içinde Qırımda eñ az yedi tintüv keçirgen Rusiye uquq qoruyıcıları «qırımtatarlarnı qorquzmağa» tırışa. Böyle fikirni «Krım SOS» aq qorçalayıcı teşkilâtınıñ talilcisi Yevğen Yaroşenko bildirdi.
«Rusiyeliler işğal etilgen Qırım yarımadasında terrornı quvetleştirmege devam ete. Soñki eki aftada Qırımda qırımtatarlarnıñ evlerinde yedi tintüv fevralniñ 23-nde demiryolnıñ zarar körmesi sebebinden keçirildi. Dört tintüv tanılmağan insanlarnıñ evlerinde oldı. Rusiye işğalci siyasetinen razı olmağan qırımtatarlarnı qorquzmağa tırışa», – dep bildirdi Yaroşenko.
Qırımdaki tintüvler 2023 senesi fevralniñ 23-nde Bağçasaray rayonında demiryolğa ketirilgen zarar haberlerinden soñ başlandı.
Fevralniñ 28-nde Rusiye mahsus hızmetleri Bağçasaray rayonınıñ Priyatnoye Svidaniye köyünde Cemilovlar qorantasınıñ evini tintti. Rusiye uquq qoruyıcıları tintüv vaqtında evde olmağan Abdulla Cemilovnıñ demiryolğa zarar ketirüvnen alâqalarını teşkerdi.
Martnıñ 6-nda aqşam Rusiye uquq qoruyıcıları qırımtatarı Edem Murtazayevniñ evinde tintüv keçirdi. Soñra onı yibergenler.
Martnıñ 6-nda Rusiye uquq qoruyıcıları Qırımtatar Milliy Qurultayı delegatınıñ 59 yaşında qardaşı Asan Abduramanovğa keldi. O künü Qurman qasabasında Memet Aşurovnıñ evinde de tintüv oldı. Soñra onı Aqmescitke sorğuğa alıp ketkenler.
Martnıñ 11-nde Rusiye mahsus hızmetleri Aqmescit rayonınıñ Pervomayskoye köyünde qırımlı Ahtem İsmailovğa tintüvnen keldi. Martnıñ 12-nde uquq qoruyıcılar Qırımtatar Milliy Qurultayınıñ delegatı Lemmar Yunusovnıñ evinde tintüv keçirdi.
Martnıñ 15-nde Rusiye uquq qoruyıcıları faal ve vatandaş jurnalisti Rolan Osmanovnıñ evini tintti. Aqmescit rayonınıñ Çoyunçı (Urojaynoye) köyünde keçirilgen tintüvden soñ Rolan Osmanovnı FSB binasına alıp ketkenler.
İç birine qabaatı aytılmadı. Rusiye uquq qoruyıcıları Qırımdaki tintüvlernen bağlı bir izaat bermey.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
