Ukrayina prezidenti Volodımır Zelenskıy, Rusiye prezidenti Vladimir Putin ölse, cenk bitecek, dep bildirdi.
"Eger Putin ölse, cenk olmaycaq. Avtoritar rejim telükelidir, çünki bu büyük havf. Çünki er şey bir adamğa bağlı olamaz. Böyle adam ketkende, institutsiyalar toqtay. Eşer o olmasa, olar tış siyaset ile degil, iç siyasetnen oğraşacaqlar", - dep bildiri Zelenskıy amerikalı mizahçı ve alıp barıcı Devid Lettermanğa intrevyü vaqtında.
Zelenskıy qayd etti ki, "Rusiye ealisiniñ büyük bir qısmı Putinge inana", amma "kerçekni añlağan, lâkin qorqqanlar da bar".
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
