Ukraina Tış işler nazirligi qırımtatar halqınıñ lideri Mustafa Cemilevge işğal etilgen Qırımda çıqarılğan ğıyabiy ükümni «fars» dep saya. Bu aqta Ukraina Tış işler naziriniñ birinci muavini Emine Ceppar Facebookta yazdı.
«Bugün Rusiye cinaiy qabaatlavnen bağlı daa bir fars yaptı. Qırımtatar halqınıñ lideri Mustafa Cemilevge qarşı eki yıl apis cezası ve 35 biñ Rusiye rublesi para cezası berildi (Cemilev reabilitatsiya yapamağan sebeplerden cezadan boşaltıldı – QA). (…) Ğıyabiy mahküm ve Mustafa Cemilevge çıqarılğan «saçma üküm» Rusiye işğalcileriniñ Qırımnıñ tamır halqını çıqmağa mecbur etmek içün qırımtatar halqı vekillerini ve liderlerini taqip etüv siyasetini devam ettire», – dep yazdı Ceppar.
Onıñ qayd etkenine köre, Mustafa Cemilev «efsane-insan» ola ve «Rusiye akimiyeti Qırımda Ukraina vatandaşlarına qarşı böyle üküm ve qararlar ne qadar çıqarsa çıqarsın, olar bütün medeniy dünya aytqan faktnı inkâr etemez: Qırım – Ukrainadır!»
Aprelniñ 22-nde Rusiyeniñ nezaretinde olğan Ermeni Bazar şeer mahkemesi qırımtatar haqlınıñ milliy lideri Mustafa Cemilevge ğıyaben üküm çıqardı. O qabaatlı tanıldı, amma aqlama etilmegen esaslarğa köre azat etildi.
Advokat Nikolay Polozov Rusiyeniñ Ermeni Bazar şeer mahkemesiniñ qırımtatar halqınıñ milliy lideri Mustafa Cemilevge çıqarılğan ükümni temyiz etecek ola.
Bundan evel Rusiye qabaatlavı qırımtatar halqınıñ lideri Mustafa Cemilev içün «Rusiye sıñırını qanunsız keçüv» maddesine istinaden üç yıl yaşav tarzı koloniyasında qalmasını istedi.
Qırım MC ve Aqyar şeeriniñ prokuraturası haber etkenine köre, qırımtatar halqınıñ milliy lideri Mustafa Cemilevni Qırımda taqip etken rusiyeli mahkemicelerge qarşı Ukrayina mahkemesine 20 qabaatlav aktını yolladı.
Ukraina prezidentiniñ Qırım Muhtar Cumhuriyetindeki temsilciligi Mustafa Cemilevge qarşı Rusiye cinaiy davasını «siyasiy taqip» dep adlandırdı.
Qırımda 2021 senesi martnıñ 5-nde mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
