Qırımlı advokat Edem Semedlâyevniñ fikirince, akimiyet bir-birine qoltutqan qırımtatar faallerini tutıp, «terrorizm» ile küreşkenini köstermege tırışa. Bu fikirni o, Qırım.Aqiqat Radiosınıñ yayınında ayttı.
«Tünevin insanlar meni qarşılamağa, qoltutmağa kelgende – olarnı vaqtınca tutuv izolâtorı ögünde tuttılar, men andan çıqacaq edim, daa çıqmadım, olarnı endi tutqanlar», – dep tarif etti Semedlâyev.
Advokatnıñ aytqanına köre, qırımtatar faalleriniñ tutuluvı Rusiye akimiyetiniñ «insanlar (mahkemelerge – QA) kelip, soy-soplarına qoltutqanını begenmegenlerinen» bağlı.
«Bu Qırımda köstermege tırışqan vaziyetini pek deñiştire. Akimiyet, terroristlerni yaqalay, ealini terroristlerden qorçalay, dep köstermege tırışa. Va lafta terroristlerge o qadar insan kelip qoltuta. İnsan kerçekten terrorist olsa ve birini patlatmağa, öldürmege, bir şekilde zarar ketirmege tırışqan olsa, oña kimse kelip qoltutmaz edi, dep tüşünem. Mında ise tam tersi ola, şunıñ içün olar kimse kelmesin dep yapmağa tırışalar», – dep qayd etti Semedlâyev.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
