Qırımda Rusiye uquq qoruyıcıları martnıñ 13-nde Bağçasaraydaki evinde keçirilgen tintüvden soñ tutulğan qırımtatar faali Edem Dudakovnı yiberdi. Bu aqta Qırımtatar resurs merkezi haber ete.
«Qırımda Rusiye işğalcileri Qırımtatar Milliy Qurultayınıñ delegatı, Qurultay Teftiş komissiyasınıñ azası Edem Dudakovnı yiberdi. Şimdi evde buluna», – dep aytıla haberde.
Qırımtatar resurs merkezi qayd etkenine köre, Dudakov tutulğan soñ Aqmescitteki FSB idaresine alıp ketirildi, anda onı bir qaç saat tutqanlar.
«Qırım birdemligi» bildirgenine köre, Dudakovnıñ evinde tintüv martnıñ 13-nde saba saat yedilerde başladı. Rusiye uquq qoruyıcıları qoradan atlap, araba qapunı açtı, soñra ise cam kiriş qapusını qırdı.
Edem Dudakov – qırımtatar faali, Qırımtatar Milliy Qurultayınıñ delegatı ve Milletlerara munasebetler işleri komitetiniñ sabıq reisi. Qırım Rusiye tarafından işğal etilgen soñ, Dudakov «Han sarayınıñ imayecisi» oldı. Faallerniñ aytqanına köre, Rusiye keçirgen «restavratsiya» neticesinde binanıñ autentik elementleri yoq ola, binalarnıñ özü bozula.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
