Qırımnıñ Rusiye başı Sergey Aksönov, kurort mevsiminde suv qıtlığı şaraitinde şeerler ve qasabalarnı suvnen temin etmek içün tafsilâtlı bir plan azırlamağa buyurdı. Aynı zamanda, eñ fena stsenariyni köz ögüne almağa degen.
«Kurort mevsiminde eali içün bütün temin etüv müessiselerniñ eñ fena vaziyetteki çalışma programmasını tam olaraq azırlaymız. Añlaymız ki, suv vaziyeti ağır. Bugünde sade bir matematika modeli olmalı, eñ beter vaziyetni köz ögüne alsaq, suv berüv cedveli yaramay olacaq. Amma aynı zamanda, o, kuror mevisimini keçirip, insanlarğa para qazanmağa fırsat bermeli. Eñ beter vaziyetke azırlanamız», – dedi Aksönov.
Qayd etti ki, yağanaqlar olsa bile, olarğa pek ümüt etmek kerekmey.
«Bütün kurort bölgelerindeki vaziyet aqqında keledejk afta bazarertesi esabatlarnı bekleyim, bu saada neler yapıldı, nasıl çalışacaqmız», – dep qoştı o.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri, suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
