Soñki afta Sudaq, Ermeni Bazarda ve Curçı rayonında koronavirus hastalarınıñ sayısı arta, dep bildirdi fevralniñ 3-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya.
«Curçı rayonında ve Ermeni Bazarda hastahaneden tış pnevmoniya keçken aftağa baqqanda 65 ve 75 fayız arttı», – dep qayd etti Penkovskaya.
Onıñ malümatına köre, umumen Qırımda keçken aftağa baqqanda COVID-19 hastalarınıñ sayısı 23% eksile. Eñ çoq pensionerler hastalana.
Keçken künü Qırımda 151 yañı koronavirus hastası qayd etildi.
Bundan evel Kefede COVID-19 hastalarınıñ sayısı arta, dep haber etilgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
