Ukrainadaki «İyegova şaatları merkezi» Rusiye işğal etken Qırımda keçirilgen tintüvlerge ve dindaşlarınıñ tutulmasına kederlendi. Bu aqta noyabrniñ 16-nda Qırım.Aqiqatqa teşkilâtnıñ cemaat ile bağ vekili İvan Riger bildirdi.
«Biz de (Cankoyeydeki tintüvler aqqında – QA) haberlerden bildik. Anda yaşağan ve yaşaycaq dindarlarnıñ telükesizligini köz ögüne alıp, haberlerde olğan malümattan ğayrı, başqa bir şey aytıp olamayıq. Barışıqsever ve itaatkâr dindaşlarımıznıñ adaletsizlikke oğrağanı bizni qasevetlendire. Bir şey ayta bilem, bir insan sovetler akimiyeti tarafından basqığa oğratılğan edi, 1990-ıncı seneleri aqlanğan edi, aynı baqışları içün bizim zamanımızda da taqip etile», – dedi Riger.
Onıñ aytqanına köre, «İyegova şaatlarınıñ» kimsege zararı yoq».
«Bu adise bizde tek duyğudaşlıq ve keder doğura. Başqalarğa zarar ketirmegen insanlar aqqında aytamız. Avropa mahkemesi, bu barışıqperverlik baqışlarını kütken yekâne hristian dini ola, qayd etken edi. Eminliknen ayta bilemiz ki, «İyegova şaatları» cemiyet ve etraftaki vatandaşlarnıñ esas menfaatlarına uyğun olğan yaşayış tarzını küteler», – dep qoştı Riger.
Noyabrniñ 16-nda Canköyde Rusiye FSB hadimleri bir qaç on evde tintüv keçirip, Rusiye ve işğal altındaki Qırımda yasaqlanğan «İyegova şaatları» diniy teşkilâtınen alâqaları bar olğanında şeklengen insanlarnı tutıp aldı. Radio Svoboda rus hızmetiniñ mühbiri bildirgenine köre, «Şaatlarnıñ» yerli taqımı – «Sivaş» – reberi Sergey Filatov tutuldı. Gruppa 2015 senesi qayd olğan edi, 2017 senesi ise «İyegova şaatları» Rusiyede yasaq etilgen soñ yoq etilgen edi.
Rusiye küç qurulışları Canköydeki tintüvlerni daa izaatlamadı.
2017 senesi aprelniñ 20-nde Rusiye Yuqarı mahkemesi «İyegova şaatlarını» idare merkezini ekstremist teşkilât olaraq tanıma qararını çıqarğan edi.
«Memorial» aq qorçalayıcı merkeziniñ malümatına köre, qomşu Rusiyede keçken sene aprel ayından başlap mezkür diniy teşkilâtnıñ 39 tarafdarı uquqiy ceetten taqip etile. 2018 senesi avgust ayında «Memorial» aq qorçalayıcı merkezi, ekstremizmde qabaatlanğan «İyegova şaatları» diniy teşkilâtınıñ 29 tarafdarını siyasiy mabüs olaraq tanıp, olarnı acele azat etmege çağırdı.
