Ukrayına Silâlı quvetleri Aqyarnıñ Nahimov rayonında Duvanköy (Verhnesadovoye) köyünde Rusiye Qara deñiz flotunıñ komandanlıq merkezi muvafaqiyetnen uruldı, dep resmiy malümat berdi.
Muracaat Ukrayına Silâlı quvetleriniñ Baş komandanı apparatınıñ strategik bağlar idaresiniñ matbuat hızmeti tarafından derc etildi. Ukrayına arbiy müessisesi bir tafsilât bermedi. Bu malümatnı alternativ menbalarda tasdıqlamaq şimdilik imkânsız ola.
Sentâbrniñ 20-nde Aqyar ve Qırımnıñ şimaliy-ğarbinde Aqmeçit qasabasınıñ sakinleri küçlü patlavlar aqqında haber ete. Rusiye kontrolindeki Aqyar yolbaşçısı Mihail Razvojayev «Duvanköy (Verhnesadovoye) ve Kaçada ava mudafaa sistemasınıñ işi aqqında bildirdi, ilk malümatqa köre, uçucısızlar urıp tüşürildi».
Ukrayına Mudafaa nazirliginiñ Baş istihbarat idaresi Andriy Yusov patlavlarnı izaatlap, Qırımdaki arbiy obyektlerge qarşı planlaştırılğan iş devam ete, dep bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
