Dünya bankınıñ Müdirler şurası Ukrayınağa inkişaf ve ğayrıdan tiklev siyasetine (DPL) qoltutuv içün ödünç çerçivesinde 1,5 mlrd dollar ayıruv qararını tasdıqladı, dep haber ete Telegramda Ukrayına baş naziri Denis Şmığal.
Ükümet yolbaşçısı qayd etkenine köre, bu paradan 984 mln dollar Yaponiyadan, 516 mln dollar Büyük Britaniyadan kelecek.
Para 2024 senesi martnıñ soñuna qadar berilecek, dep haber etile.
Şmığal Dünya bankı, Yaponiya ve Büyük Britaniya ükümetlerine Ukrayınanıñ makromaliye istiqrarını saqlavğa qoltutuv ve isse içün teşekkürler bildirdi.
«Bu paralar eñ müim bücet masraflarına ketecek: içtimaiy, gumanitar maqsadlar ve ğayrıdan tiklev», – dep qoştı Nazirler Şurasınıñ yolbaşçısı.
Şmığal bildirgenine köre, Ukrayına Dünya para fondundan 880 mln dollar aldı – EFF keniş maliye programması çerçivesinde maddiy qoltutuvnıñ üçünci qısmıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
