Poloniya devlet başı Ancey Duda, eki kişiniñ ölümine sebep olğan raketa qazası "aselet yapılğan yücüm degil, "ökünçli qaza" kibi körüne, dep bildirdi.
"Bunıñ Poloniyağa qarşı aselet ücüm olğanına dair alâmetler yoq. Bu ğaliba Rusiyede yapılğan S-300 raketası edi. Amma şimdilik bu raketanıñ Rusiye tarafından uçurtılğanına dair delillerimiz yoq", - dedi Duda.
O, "yazıq ki, Poloniya topraqlarına tüşken raketa ava mudafaası sistemasınıñ olğanına dair bir çoq alamet bar", dep qoştı.
Poloniyanıñ baş naziri Mateuş Moravetskiy «buhran vaziyeti sebebinden» ükümetniñ telükesizlik ve mudafaa komitetiniñ acele toplaşuvını çağırdı, dep bildirdi Poloniya ükümetiniñ matbuat kâtibi Petr Müller. O, «teşkerilmegen malümatnı derc etmemege» çağırıp, izaatlar toplaşuvdan soñ olacaq, dep qoştı.
Rusiye ordusı noyabrniñ 15-nde Ukrayınağa qarşı tahminen yüz raketa attı. Bu oktâbrniñ 10-nda Qırım köpründe olğan patlavdan soñ atılğan raketa sayısından çoq oldı, dep haber etti Ukrayına Arbiy-ava quvetleriniñ matbuat kâtibi Yuriy İgnat milliy telemarafon yayınında. Oktâbrniñ 10-nda Rusiye Ukrayınağa 84 raketa attı.
Ücüm neticesinde Ukrayına şeerleriniñ bir qısmı ışıqsız qaldı.
Poloniyağa tüşken raketalar Rusiyege aitmi ve bugün Ukrayınanıñ energetika infrastrukturasına qarşı qullanıldımı ya da ava mudafaa vastaları ola – şimdilik belli degil. Poloniya – NATO azası; Rusiye Ukrayınağa qarşı büyük ücüm başlatqanından ilk sefer raketalar Poloniyağa tüşti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
