Ukrayina Silâlı quvetleriniñ Baş komandanı general Valeriy Zalujnıy Yañı yıl ve Milât bayramı munasebeti ile hayırlavlarında Ukrayinanıñ "duşmannı yeñmek" içün yeterli qadar quveti bar, dep bildirdi.
"Biz cenkni saylamadıq. Amma cenkni qabul ettik. Tañrı bile bizim tarafımızda. Bizim omuzlarımızda ve bizim yaqınlarımıznıñ omuzlarında qıyın sınavlar, ağrılar ve azaplar bar. Bu Milât bayramında közyaş dadı ve qan tüsü bar. Amma duşmannı yeñmek içün yeterli qadar quvetimiz bar. Bir millet mucadelede doğar. Allah sizni qorçalasın! Ğalebemiz Ukrayinanıñ çeçeklenmesiniñ başlanğıçı ve Rusiyeniñ soñu olsun", - dedi Zalujnıy.
Ukrayina Silâlı quvetleriniñ Baş komandanı şunı da ayttı: "Er kesni: cebede olğanlarnı, bizni mudafaa etkenlerni, olarnıñ tuvğanlarını ve yaqınlarını, dua etkenlerni ve quvetlerimizge yardım etkenlerni ve yamanlıqqa qarşı turğanlarnı Yañı yıl ve Milât bayramı ile can yürekten hayırlayım!".
Evel, dekabrniñ 25-nde Valeriy Zalujnıy Milât bayramı ile hayırlavında ortaqlarğa destek ve yardım içün teşekkür etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
