Saratov vilâyetiniñ valisi Roman Busargin regionda dronlarnıñ kütleviy ücümi bar, dep ilân etti. Onıñ aytqanına köre, yaralanğanlar bar. Saratov ve Samara ava limanları öz işini toqtattı.
Engels şeerinde hastahane binası zarar kördi, bir kişi yaralandı, dep aydınlattı regionnıñ valisi Roman Busargin. Camlar qırılğan müessiseniñ videolarını Telegram kanalları derc ete.
Soñra vali dronlarnıñ ücüminden soñ daa bir yerli sakinge tibbiy yardım kerek olğanını ayttı.
Busargin Sokolovaya Gora rayonındaki mustaqil evge zarar kelgenini de tasdıqladı. Yerli sakinler büyük yanğınnıñ fotoresimlerini derc etti. Haber etilgenine köre, yaralanğanlar olmadı. Umumen Engels şeerinde 30-dan ziyade mustaqil ev zarar kördi.
Ukrayina kütleviy haber vastaları geolokatsiya malümatına esaslanıp, «Engels-2» arbiy uçaq alanınıñ anbarına darbe endirildi, dep yaza.
Berilgen malümatqa köre, uçucısız ücümi vaqtında Saratov sakinleri de patlav seslerini eşitti.
Rusiye aviatsiyası Saratov ve Samara ava limanlarınıñ işi vaqtınca toqtatıldı, dep bildirdi.
Rusiye Federatsiyasınıñ Mudafaa nazirligi bildirgenine köre, Saratov vilâyetinde 54 uçucısız urıp tüşürildi. Müessise malümatına köre, Rusiye ve işğal etilgen Qırımğa 132 dron ücüm etti.
Saratov vilâyetindeki Engels Ukrayina uçucısızlarınıñ ücümlerine bir qaç kere oğrağan edi. Şeer yaqınlarında «Engels-2» Rusiye ava bazası buluna, andan Ukrayinağa darbe endirgen strategik bombardımancılar uça.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
