Ukrayina dronları dekabrniñ 23-nde aqşam Rostov vilâyetindeki Millerovo şeerine ücüm etti, anda aynı adı olğan arbiy uçaq alanı yerleşken. Bu aqta region valisi vazifesini eda etken Yuriy Slüsar ve Rusiye Mudafaa nazirligi bildirdiler.
Slüsarnıñ malümatına köre, Rusiyeniñ ava mudafaası dekabrniñ 23-nde aqşam Millerovo rayonında sekiz ukrayin dronını urıp tüşürdi. Mudafaa nazirligi ise dekabrniñ 23-nde aqşamdan başlap Rostov vilâyetinde 12 dron urulğanını bildirdi. Nazirlik tam olaraq qayda olğanını köstermedi.
Vali vazifesini eda etken adam ateş neticesinde yaralanğanlar olmağanını bildire.
Yerli Telegram kanalları ateş ve patlavlar videolarını derc ete – berilgen malümatqa köre, Millerovo rayonından, onıñ çetinde arbiy aerodrom bar.
Rusiye monitoring kanalları da Krasnodar ülkesindeki Yeysk tarafına uçqan dronlar aqqında haber etti. Doğrudan-doğru Yeyskten ücüm olğanı aqqında haberler daa kelmedi.
Dekabrniñ 22-ne keçer gecesi Rostov vilâyetinde kökte, şu cümleden Millerovo, Taganrog ve Novoçerkassk yanında bir qaç ukrayin dronı da tüşürilgen. Dekabrniñ 19-nda Rostov vilâyetindeki Novoşahtinskiy cermay mahsulatları zavodında dron ve raketalarnıñ ücümi sebebinden yanğın çıqtı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
