Saban ayınıñ 14-nde Moskva ve Rusiye paytahtınıñ civarları bir aftadan berli ekinci kere uçucısız uçaqlarnıñ ücümlerine oğradı. Zarar körgenler aqqında malümat yoq.
Moskva şeer yolbaşçısı Sergey Sobâninniñ bildirgenine köre, ava mudafaası RF paytahtına uçqan dört dronnıñ ücümini keri çekti. Parçalar tüşken yerde mütehassıslar çalışa.
Şaatlarnıñ bildirgenine köre, hususan, ASTRA neşiri, Moskvanıñ cenübiy çetinde "Cenübiy Bittsâ" mesken kompleksinde patlav oldı, o videoğa tüşti.
Balaşiha şeerinde de patlavlar oldı, yerli sakinler azbarda pilotsız uçaqnıñ parçalarını taptı.
Moskvada, pilotsız uçaqnıñ ücüminden soñ, mesken evniñ damında yanğın çıqtı.
Bundan da ğayrı, Dorogomilovo rayonındaki mesken evinde patlav aqqında haber etile.
Daa evel belli olğanı kibi, Moskvanıñ "Vnukovo" ava limanı seferlerni qabul etmey ve yollamay.
Ukrayina tarafı Rusiyege qarşı yapılğan ava ücümleri aqqında haberni şimdilik izaatlamadı.
Saban ayınıñ 11-nde ukrayin dronları Moskva ve Moskva vilâyetine misli olmağan ücüm etti. 90 dane uçaq ücüm etken Moskva civarında üç insan elâk oldı. Umumen 300-den ziyade uçucısız uçaq bar edi.
Rusiyeniñ Ukrayinağa tam miqyaslı istilâsı başlağan soñ, Rusiye regionları muntazam sürette ateşke ve uçucısız uçaqlarnıñ ücümlerine oğray. Rusiye Mudafaa nazirligi, Rusiye territoriyasında tüşürilgen raketa ve dronlar aqqında esabat bere. Kıyiv bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
