Birleşken quvetler tedbirleriniñ ştabı, fevralniñ 29-nda Donetsk vilâyetiniñ Nevelskoye, Mayskoye ve Krasnogorovka mesken yerleri yanındaki Ukraina arbiyleriniñ mevzilerine qarşı üç kere ateş açılğanını qayd etti.
Ştab malümatına köre, Ukraina arbiyleri arasında ğayıplar yoq. Fevralniñ 28-iniñ neticelerini çıqarıp, ştab 8 kere ateş açılğanını ve bir ukrain askeri yaralanğanını bildirdi.
Fevralniñ 29-nda saba «DNR» gruppirovkası Donetsk civarındaki Staromihaylovka yanındaki ve Leninskoyedeki mevzilerine qarşı ateş açılğanını bildirdi. Bundan ğayrı, terrorcılar fevralniñ 28-nde 13 kere ateş açılğanını bildirdi.
«LNR» gruppirovkasınıñ vekilleri noqtalarına qarşı bir kere ateş açıldı, dep bildire.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2019 senesi oktâbrniñ 31-ne qadar silâlı zıddiyet neticesinde Donbasta 13000 - 13200 insan elâk oldı.
