Dniproda yanvarniñ 14-nde Rusiye raketası tarafından yoq etilgen çoq qatlı mesken evniñ viraneleri astından tapılğan 12 ceset ve ceset parçaları alâ aynılanamadı. Bunı Dnipro vilâyetiniñ arbiy memuriyetiniñ yolbaşçısınıñ mesleatçısı Natalya Babaçenko bildirdi.
"Qıdıruv-qurtaruv işleri tünevin yekünlendi. Şimdilik Rusiye raketasınıñ darbesi neticesinde elâk olğanlarnıñ sayısı 45. 12 ceset ve ceset parçaları alâ aynılanamadı. Bu kün devamında tek üç inçannıñ kim olğanı tanıldı. 17 adam bellisiz ğayıp sayıla, elbette olar bu şahsiyeti belli olmağan kişiler arasında ola bile", - dep qayd etti o.
Bundan ğayrı memurnıñ sözlerine köre, yaralanğanlarnıñ sayısı 80 oldı, keçenlerde aqşam hastahanege yardım istegen daa bir qadın muracaat etken.
Yanvarniñ 14-nde Rusiye ordusı Ukrayınağa qarşı daa bir kütleviy raketa darbesini endirdi. Neticede Dniproda doquz qatlı evniñ bir qısmı viran etildi. Viraneler bir qaç kün devamında baqıldı.
Qırımda ise Rusiye ordusını Dniprodaki mesken evge darbe endirgeni içün içtimaiy ağlarda qabaatlağanlarnı taqip etip başladılar.
Ukrayına arbiyleriniñ malümatına köre, Rusiye Dniprodaki doquz qatlı evge X-22 aviatsiya qanatlı raketasınen darbe endirdi. O, Rusiyeniñ Kursk vilâyetinden Tu-22 bombardıman uçağından atıldı. Ukrayına Silâlı quvteleriniñ Ava quvetleri komandanı general-leytenant Mıkola Oleşçuk mahsus beyanatında Ukrayınanıñ «böyle raketalarnı tüşürecek ateş vastaları yoq», dep bildirdi.
Kreml Rusiye ordusınıñ Dniprodaki çoq qatlı evge qarşı yapılğan raketa darbesinen alâqası yoq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
