Rusiyeniñ ücümleri neticesinde Dniproda üç insan elâk oldı, daa 18 kişi yaralandı, olarnıñ arasında bala bar, dep bildirdi vilâyetniñ arbiy memuriyetiniñ yolbaşçısı Serğiy Lısak.
"Duşman qaba ücümlerini devam ete. Dnipro boyunca raketa ve ucucısız dronkar uçurdı. Ne yazıq ki, aqibetleri de oldı. Üç adam elâk oldı. İlk olaraq 18 yaralanğan kişi bar. Olarnıñ arasında 14 yaşında bir qız", — dep yazdı o telegramda.
Lısak, atışlar neticesinde bir qaç yanğın çıqtı, viraneler bar, dep qoştı.
Soñki vaqıtları Rusiye Dniproğa ücümlerini quvetleştirdi. İyünniñ 28-nde aqşam Rusiye quvetleri Dniproğa ücüm etip, çoq qatlı binanıñ dört qatını yıqtı. Yerli akimiyetniñ malümatına köre, eki insan elâk oldı, daa 12 yaralandı. İyülniñ 1-nde Dniprda yüz bergen ücüm neticesinde yedi insan yaralandı.
Rusiye arbiyleri çeşit silâlardan Ukrayina regionlarına muntazam surette ücüm ete. Delillerge baqmadan, Moskva Ukrayinanıñ bütün vatandaşlarına ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
