Rusiye Federatsiyası aprelniñ 16-nda aqşam Dniproğa ücüm etti, üç kişi elâk oldı, aralarında bala bar, dep haber ete Ukrayina devlet fevqulâde vaziyetler hızmeti.
«Aqşam keç saatlarda duşman Dnipro şeerine uçucısızlarnen ücüm etti. Rusiyeliler üç can aldı, biri – bala. İlk malümatqa köre, 28 kişi yaralandı, dördü – bala», – dep aytıla haberde.
Ukrayina devlet fevqulâde vaziyetler hızmetiniñ malümatına köre, evler, student yataqhaneleri, oquv yurtu ve aş müessisesiniñ binaları, maşinalar zarar kördi.
Şeerde darbe sebebinden bir qaç yanğın oldı, olar söndürildi, dep qoştı qurtarıcılar.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
