Cumaaqşamı künü, sentâbrniñ 24-nde, saat 16:00-da Dniprodaki ATO Müzeyinde (Dmitriy Yavornitskiy cad., 16) «Qırım işğaliniñ reinesi olğan qırımtatar qorantalarınıñ taqdirlerine» bağışlanğan «İşğal reineleri» albomı ve sergisi taqdim etilecek.
«Bu insanlar nasıl yaşay? Ayatları nasıl deñişti? Nasıl bir qıyınlıqlarğa rastkeldi? Nurlu kelecek içün nasıl küreşeler? Ne arz eteler? Bu suallerniñ cevabını sentâbrniñ 24-nde tedbirimizde ala bilesiñiz. Semetdeşlerimizniñ 20 ikâyesinen tanış olmağa davet etemiz: 10 – memleket içinde köçip kelgen şahıs, 10 – vaqtınca işğal etilgen Qırımda yaşağan qoranta», – dep bildirdi «Qırımtatar Resurs Merkeziniñ» taqdim merasimini teşkil etkenniñ matbuat hızmeti.
Berilgen malümatqa köre, tedbirni karantin rejiminiñ normalarına köre ve karantin sıñırlarına riayet etip keçirmege planlaştıralar.
«Qırımtatar Resurs Merkezi» 2020 senesi I kvartalında Rusiye işğal etken Qırımda insan aqları bozuluvlarınıñ talilini taqdim etip, bu müddet içinde yarımadada yüzge yaqın insan apiske alındı, dep qayd etti. «İşğalciler tarafından yapılğan bozuvlarnıñ büyük qısmına tamır qırımtatar halqı oğray. Yarımadada bu sistem alına keldi», – dep bildire Qırımtatar Resurs Merkezi.
Qırımtatar Resurs Merkeziniñ daa evelki malümatına köre, 2019 senesi yarımadada 150-den çoq insan tutuldı ve 300-den çoq kişi azatlıqtan marum etildi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
