Dnipropetrovsk vilâyetinde Rusiye raketa ücümi neticesinde bir qaç yerde darbe endirildi, elâk olğan ve yaralanğanlar bar, dep bildirdi vilâyetniñ arbiy memuriyet reisi Serğiy Lısak.
«Dniproda beş qatlı bina yana. Qısmen viran eldi. Anda insanlar buluna bile», – dep yazdı memur.
Onıñ aytqanına köre, Rusiye ücümi neticesinde eñ az eki insan elâk oldı, daa 15 kişi yaralandı. Dnipronıñ eki infrastruktura obyekti zarar kördi.
Sinelnikovo şeerinde de elâk olğan ve yaralanğanlar bar, memur qurbanlarnıñ sayısını aytmadı, dep bildirdi Lısak.
«Yaralanğanlar arasında balalar bar. Biri ağır alda. Dört mustaqil ev qısmen viran etildi, daa sekizi zarar kördi», – dedi o.
Soñra Lısak sekiz yaşında bala hastahanede can berdi, dep haber etti.
Üç insan Krıvıy Riğde yaralandı. Pavlogradda müessiselerden biri zarar kördi
Delillerge baqmadan, Moskva, büyük istilâ başlağanından berli, Ukrayina vatandaşları ve infrastrukturağa nisbeten maqsatlı ücüm olğanını red ete.
BM Ukrayına insan aqları monitoring missiyası Ukrayınada Rusiyeniñ büyük istilâsı başlağanından 10810 vatandaş ölgenini bildirdi, 20556 kişi yaralandı. Teşkilât vatandaşlar arasında daa çoq qurban bar, dep tahmin ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
