Dnipro suvu Şimaliy-Qırım kanalından Canköy rayonınıñ Tarhanlar (Pobednoye) köyüne qadar keldi. Bu aqta Qırım.Aqiqat mühbiri bildirdi.
Tarhanlar yaqınlarında tulumba stantsiyası bar, o, suvnı kanaldan cenübiy-şarqiy yönelişte «kötere».
Ukraina Devlet ekologik inspektsiyası Ukrainada cenk başlağanından Rusiye «aman-aman 620 million grivnalıq Ukraina suvunı hırsızladı», dep bildirdi.
«Tecavuzcı memleket 2022 senesi fevralniñ 24-nde suvnı Dnipro suvunıñ alt havuzındaki Kahovka suv anbarından Qırımğa bergen Şimaliy-Qırım kanalınıñ bütün gidrotehnik inşaatlarını zapt etti. Fevralniñ 27-nde duşman vaqtınca qurulğan bentni, maşina köprüni ve kanalnıñ esas bölme inşaatını viran etti», – dep bildirdi Ukraina müessisesi.
Fevralniñ 25-nde Rusiye kontrolindeki Qırım yolbaşçısı Sergey Aksenov Şimaliy-Qırım kanalından Qırım yarımadasına suv berilüvini ğayrıdan başlatmaq içün eki afta kerek, dep bildirdi. Bundan evel Aksenov Qırım Şimaliy-Qırım kanalından suv almağa azırlana, dep ayttı.
Martnıñ 12-nde Ukraina istihbaratınıñ yolbaşçısı Kirill Budanov Azatlıq Radiosınıñ leyhası olğan Qırım.Aqiqatqa bergen intervyüsında «Şimaliy-Qırım kanalından Qırımğa suv özcesine ketmez», dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1lynpf6ndesae.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
