Rusiye askerleri martnıñ 14-nden 15-ne keçer gecesi Dnipro ava limanına ücüm etti. Bu aqta Dnipro vilâyetiniñ arbiy memuriyet yolbaşçısı Valentın Rezniçenko Telegram kanalında bildirdi.
Onıñ malümatına köre, eki raketa darbesi oldı, neticede uçuv-qonuv yolağı viran etildi, terminal zarar kördi.
Vilâyetteki Devlet fevqulâde vaziyetler baş idaresiniñ reberi Andriy Kulbaç ava darbeleri aqqında malümatnı tasdıqladı. Onıñ malümatına köre, ateş «İskander» raketa kompleksinden açılğandır.
Onıñ qayd etkenine köre, uçuv-qonuv yolağı viran etildi ve qullanılmaycaq alğa keldi.
Yaralanğan ve vefat etkenler, ilk malümatqa köre, yoq.
Martnıñ 13-nde İvano-Frankivsk şeer yolbaşçısı Ruslan Martsinkiv Rusiye ordusınıñ darbesi neticesinde yerli ava limanınıñ infrastrukturası zarar kördi, dep bildirdi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
