Link açıqlığı

Saatnıñ esas haberi

Açlıq tutqan Sentsov öle bileceginiñ farqındadır – Cemilev (+ video)


Mustafa Cemilev Oleg Sentsovğa qol tutuv tedbirinde
Mustafa Cemilev Oleg Sentsovğa qol tutuv tedbirinde

100 kün açlıq tutqan Ukraina rejissörı Oleg Sentsov, narazılıq kösterilmesini devam etip Rusiye ile Qırımda zornen tutulğan Ukraina siyasiy mabüsleriniñ azat etilmesini talap eterken sağlığı ve ömüri telüke altında olğanlarını añlay.

Bunı Azatlıq Radiosı içün bergen intervyüde qırımtatar halqınıñ lideri Mustafa Cemilev söyledi.

Cemilev: «Oleg Sentsov özüni yaqa. Öle bilecegini bile-bile, özüniñ degil de, bütün siyasiy mabüslerniñ azat etilmesi kibi alicenap talaplarnı ortağa qoya. Men çıqışta bulundım, ayttım, açlıqnı toqtatmağa davet ettim. İnsanğa: açlıq tutmağa devam et ve öl! demege kimseniñ maneviy aqqı yoq. Olar (yani açlıq tutqanlar – QA) öle bilecekler, bu, sağlıq içün zarardır, demek nafiledir – olar bunı biz aytmasaq de bile», – dedi.

Daa evel Rusiyeniñ Cezalarnı yerine ketirüv federal hizmetinde, açlıq tutqan Sentsovğa «ölmege yol bermemek» niyetinde olğanlarını beyan etip, siyasiy mabüsni zornen aşatacaqları ile qorquzdılar.

Rusiyede mahküm etilgen Ukraina rejissörı Oleg Sentsov mayıs 14-te Rusiye apishanelerinde bulunğan bütün Ukraina siyasiy mabüslerini azat etmek talabınen müddetsiz açlıq ilân etti.

Sentsov ve Qırım anarhisti Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıl sert rejimli koloniya cezasına mahküm etti. Kolçenkoğa 10 yıl koloniya berildi. Ekisi de qabaatlarını tanımadı.

«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.

XS
SM
MD
LG