Aprelniñ 26-nda «QırımSOS» cemaat teşebbüsi Kyivde Rusiye elçiligi yanında «Diqqat! İnsan ğayıp oldı» adlı aktsiyanı keçirdi. Bu «Find and Free» kampaniyası çerçivesinde işğal etilgen Qırımda mecburiy ğayıp olğanlarnıñ ve olarnıñ tuvğanlarınıñ destegine keçirilgen 57-nci tedbir oldı. Bu aqta Qırım.Aqiqatqa aktsiyanıñ teşkilâtçıları aytıp berdi.
«Qırımda işğal yılları devamında qaçırılğan ve taqdirleri aqqında alâ daa bir şey belli olmağan 15 insannınñ ğayıp olması aqqında ilânlar Rusiye elçiliginiñ etrafında türlü noqtalarda yerleştirildi. Er bir kâğıtta bu insanlarnıñ ğayıp olması aqqında belli olğan bütün malümatnı yerleştirdik ve yoldan keçkenlerni Rusiye elçiliginden olarnıñ taqdirleri aqqında malümat talap etmege çağırdıq», – dep aytıp berdiler «QırımSOS»ta.
Aktsiya iştirakçileri böyle etip, insanlarğa mecburiy ğayıp olmalar, qaçırılğanlarnıñ tapılması ve qabaatlılırnıñ mesüliyekte çekilmesi içün Rusiye mesül olğanını hatırlmatmaq edi, dep bildire.
«QırımSOS»nıñ malümatına köre, 2014 senesinden işğal etilgen Qırımda 44 insan bellisiz ğayıp oldı, olardan 23 üçü qaçırıdı, amma biraz soñra sağ tapıldı, altısı ise ölü tapıldı.
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Evel, ğayıp olğan ve taqdirleri aqqında alâ daa bir şey belli olmağan insanlarnıñ cevli yayınlanğan edi. Bu Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Köstenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov i Ervin İbragimov.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
