Qırımtatar halqınıñ lideri Mustafa Cemilev Çeh Cumhuriyeti Tış işler naziri Tomaş Petrşiçek mukâfatı – «Diplomatiyadaki yararlıqlar» medaliniñ laureatı oldı. Bu aqta Ukraina Tış işler nazirliginiñ matbuat hızmeti bildire.
Cemilev «ayat devamında insan aqları qorunmasına qoşqan issesi» içün mukâfatqa lâyıq köründi.
Çehiya Tış işler naziri farqlı memleketlerniñ meşur şahsiyetlerini taqdirledi. COVID-19 pandemiyası sebebinden nazir mukâfatlarnı şahsen berip olamay, medaller çetel diplomatik müessiselerine berilecek.
2019 senesi noyabr ayında Kyivde qırımtatar halqınıñ lideri, Ukraina halq deputatı Mustafa Cemilevge Avropa konservetorları ve islâatçılar firqasınıñ «Azatlıq Mukâfatı» berildi.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
