Çeçek ayınıñ 9-nda gece Rusiyeniñ Krasnodar ülkesinde dronlar cermay borusı infrastrukturasınıñ bir qısmına ücüm etti, dep bildirdi cumaaqşamı künü Dezinformatsiyağa qarşılıq kösterüv merkeziniñ yolbaşçısı Andrey Kovalenko:
"Pilotsuz uçaqlar, "neft borusı infrastrukturasınıñ müim bir bölügi olğan" Krımskaya hat istisal ve dispetçerlik stantsiyasına ücüm etti".
Daa evel bu stansiyağa ücüm etilgeni aqqında, "magistral boru ağları sistemasına kirgen" rus ASTRA telegram kanalı bildirdi, onıñ OSINT-talilş malümatına köre, obyektniñ territoriyasında elektrik stansiyası yandı.
Krasnodar ülkesiniñ gubernatorı Veniamin Kondratyev gece regionğa "pilotsız uçaqlarnıñ" ücüm etkenini bildirdi. Onıñ bildirgenine köre, Qırım rayonınıñ Suvuq-Dere qasabasında yıqılğan parçalar neticesinde erkek elâk oldı. Rusiye akimiyeti resmiy şekilde infrastrukturanıñ zarar körgenini bildirmedi.
Rusiyeniñ büyük istilâsı başlağan soñ Rusiyede ve işğal etken topraqlarında çeşit obyektler ava ücümlerine oğray. Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.