İşğal etilgen Qırımda Rusiye akimiyeti Ukrayına vatandaşlarına ait ilk «devletleştirilgen» obyektlerni sattı. Al-azırda sekiz mezat keçirildi, 815 million rublelik aktivler satıldı. Bu aqta Rusiye kontrolindeki Qırım parlamentiniñ yolbaşçısı Vladimir Konstantinov bildirdi.
Onıñ aytqanına köre, laf mesken fond ve ticaret mülki obyektleri aqqında kete. O, şimdi açıq mezatlarda daa dört mesken satıla, dep qoştı. Olarnı 27 million rublege esaplaylar.
Konstantinov daa 100 obyektniñ satılması planlaştırıla, dep ayttı. Olarnıñ arasında Ukrayına prezidenti Volodımır Zelenskıyge ait olğan meskenler de bar eken.
Qırımnıñ Rusiye parlamentiniñ spikeri Vladimir Konstantinov Kreml kontrolindeki deputatlar Zelenskıynıñ dairesi ve Aqmescitteki Meclis binasınıñ «devletleştirilüvine» rey berdi, dep bildirgen edi. Cedvelge Ukrayına bankları ve sanayı müessiseleri, şarap müessiseleri, bala lageri ve digerleri kirdi.
Qırımnıñ Rusiye yolbaşçısı Sergey Aksenov Qırımda «Ukrayına iş adamlarınıñ mülkini» satıp kâr etken paranı Rusiyeniñ Ukrayınağa qarşı cenkine berecekler, dep aytqan edi.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva Ukrayına insan ve devlet aqlarını bozğan areketlerni qabul etmeycek, dep bildirdi. Hususan «devletleştirüv» ya da mulk musaderesi qararları tanılmaycaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
