Rusiye kontrolindeki Qırım Devlet medeniy mirasnı qoruv komiteti Qırımnıñ Rusiye medeniyet nazirliginiñ erkânına qoşulacaq.
Böyle bir qararnı Qırımnıñ Rusiye yolbaşçısı Sergey Aksenov qabul etti.
«Bu federal modelge uyğun, tarihiy-medeniy mirasnı qoruv, saqlav ve populârlaştıruv işini Rusiye medeniyet nazirligi, hususan Medeniy mirasnı devlet qoruv departamenti yapa. Bu model yañıdan teşkil etüv içün temel olacaq», – dep yazdı Aksenov Facebookta.
Onıñ aytqanına köre, eki qurulışnıñ birleşmesi devlet akimiyeti sistemasınıñ optimizatsiyasına yardım etecek.
Aksenov, Medeniyet nazirligi faaliyetiniñ nizamnamesine deñişmeler kirsetilecek, anda devlet komitetiniñ yapqan işi de qoşulacaq, dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
