Kyivniñ Dnipro rayon mahkemesi noyabrniñ 19-nda Qırım Muhtar Cumhuriyeti Yuqarı Şurasınıñ sabıq deputatı Vasiliy Ganışnı 12 yılğa azatlıqtan marum etmege qarar alda. Bunı Qırım.Aqiqat mühbiri mahkeme salonından haber ete.
Munaqaşada prokuratura sabıq deputatnı 12 yılğa üküm etmege rica etken edi. Ganış ve advokatı onı qabaatsız tanıp, aqlamağa rica etken ediler.
Ganışnıñ aytqanına köre, o, «Ukraina halqına ve devletine qarşı iç bir vaqıt cinayet işlemegen edi», ve şaatlarnıñ ifadeleri, onıñ fikirince, bunı isbatladı.
Sabıq deputat 2015 senesi aprelniñ 28-nde Qırımdan çıqqanda yaqalanğan edi. Qırım Muhtar Cumhuriyetiniñ prokuraturası sabıq deputatnı Qırımda Rusiyeniñ faaliyetine yardım etip, devletine hainlik yapqanında qabaatladı. Ganışnıñ eki cinayeti qayd etile: 2014 senesi aprelniñ 11-nde Qırımnıñ Rusiye Anayasasına rey bermesi ve 2014 senesi sentâbrniñ 14-nde Rusiye qanunlarına köre keçirilgen Kefe şeer şurasınıñ saylavlarında iştirak etmesi.
Qırımlı siyasetçi qabaatlavnı sebepsiz sayıp, «Qırımnıñ Rusiyege qoşulması aqqında referendum» keçirilmesine qarşı rey bergen yekâne deputat olğanını bildire. Onıñ aytqanına köre, o, «Qırımnıñ Rusiye Anayasasına» rey bermedi ve onıñ qabul etilgen kününde parlamentke içtimaiy siyaset nazirinen körüşmek içün kelgen edi. Ganış şeer şurasınıñ Rusiye saylavlarında namzetini köstergenini inkâr etmey.
Amma bunı yerli meclisniñ ricasınen Kommunistler firqasınıñ namzetinden reylerni «almaq» içün yapqanını ayta.
Ganışnıñ davası boyunca mahkeme 2015 senesi avgust ayında başlağan edi. 2017 senesi fevral ayında, üküm çıqarılmasına qadar bir qaç kün qalğanda, Yüksek adalet şurası qadılarnıñ başı Aleksandr Fedükni işten çıqardı. Davanıñ yañı baş qadısı saylandı, mahkeme yañıdan başladı.
2015 senesi aprel ayından 2016 senesi yanvar ayına qadar Ganış SİZOda bulunğan edi, bundan soñ üküm çıqarılğanına qadar – ev apsinde.
Vasiliy Ganış 2010 senesinden 2014 senesine qadar Qırım Muhtar Cumhuriyetiniñ «Partiya regionov» fraktsiyasından deputatı olğan edi. Deputat işini 2008 senesinden berli yapqan Kefe şeer yolbaşçısınıñ muavini işinen birleştirgen edi. Kefe şeer şurasınıñ ve ekinci çağırılış Qırım Muhtar Cumhuriyeti Yuqarı Şurasınıñ deputatı edi.
