«Devlet hainligi» içün 12 yıl apis cezasına mahküm etilgen 66 yaşındaki Aqyar sakini, nefaqacı Galina Dovgopolaya cezasını çekmek içün Aqmescit SİZO-sından Rusiyege etap etildi. Bunı Qırım uquq qoruyıcı gruppası haber etti.
Uquq qoruyıcılarnıñ malümatına köre, şimdi Galina Dovgopolaya Krasnodarnıñ 1-nci SİZO-sında buluna.
«Qırım uquq qoruyıcı gruppasınıñ fikrince, Dovgopolayanı tuvqif etilmesiniñ kerçek sebebi onıñ siyasiy baqışlarıdır. Galina Qırımnıñ işğalini açıq şekilde tenqit ete edi ve Ukraina qıtasında faaliyet köstergen ukrain göñülli teşkilâtlar ile işbirlik ete edi», – dep qayd eteler teşkilâtta.
Rusiye kontrolindeki Aqyar şeer mahkemesi 2021 senesi martnıñ 24-nde «devlet hainliginde» qabaatlanğan pensioner qadınnı umumiy rejimli koloniyada qalmasına üküm etti.12
Fevral ayında berilgen malümatqa köre, mahkeme Dovgopolayanıñ davasını temelden baqıp başladı. Qırımdan Moskvadaki «Lefortovo» SİZOsına avuştırılğan qadın aynı kamerada qalğan diger qadın tarafından bir qaç kere köteklengen soñ başqa kamerağa alındı.
2019 senesi noyabrniñ soñunda Rusiye Federal telükesizlik hızmeti işğal etilgen Aqyarda Ukraina Mudafaa nazirliginiñ istihbaratı içün casuslıqtan şübheli olğan qadın tutuldı, dep bildirgen edi. 2020 senesi devamında sıñırlav tedbiri bir qaç kere uzatılğan edi.
