Link açıqlığı

Devlet Dumasında Rusiye Baş prokurorı adına Sovetler Birligi dağıtılğan vaqıtta olıp keçken adise-vaqialarnı teşkermek talabınen muracaat azırladılar. Deputatlarnıñ fikirince, oña esaslanıp, cinaiy işler açılacaq. Böyle etip, olar soñki sovet reberi Mihail Gorbaçövğa qarşı cinaiy iş açılacağına ümüt eteler, dep yaza «İzvestiya».

Öz muracaatında (vesiqa muarririyette mevcut) deputatlar SSCB vatandaşları devlet bir olmasına qol tuttılar, sovet başlığı ise qanunsız alda areket etip, devlet dağıtılmasına yol berdi, dep bildireler. Deputatlarnıñ vesiqasında qayd etile ki, 1991 senesi noyabrniñ 4-de SSCB Baş prokuraturasınıñ devlet telükesizligi aqqında qanunlarğa riayet etüvni nezaret etken idare Sovetler Birliginiñ prezidenti Mihail Gorbaçövğa qarşı cinaiy iş açqan edi. Lâkin ertesi künü Baş prokuratura soñki sovet reberiniñ tesiri altında bulunıp, cinaiy iş açılması aqqında qararını lâğu etti. Gorbaçövnı SSCB Anayasasına uymağan SSCB Devlet şurasını meydanğa ketirüvde qabaatlaylar. Devlet şurası Pribaltika sovet cumhuriyetleriniñ mustaqilligini tanıdı, dep haber ete «İzvestiya».

Deputatlarnıñ fikirince, bunıñ kibi cinayetler eskirmey, Gorbaçöv ise al-azırda cinaiy mesülietke çekile bile.

Muracaat teşebbüsçileri «Yedinaya Rossiya» deputatları Yevgeniy Födorov ve Anton Romanov, KPRF azaları İvan Nikitçuk ve Oleg Denisenko ve LDPR fraktsiyasınıñ vekili Mihail Degtâröv ola.
XS
SM
MD
LG