Bazarertesi künü, iyülniñ 15-nde, Ukraina insan aqları vekâletlisi Lüdmila Denisovanıñ Rusiye zenaatdaşı Tatyana Moskalkova ile körüşüvi başlandı.
Bu aqta Ukraina ombudsmeniniñ saifesi haber ete.
«Rusiyede ve işğal etilgen Qırımda tutulğan Ukraina vatandaşlarınıñ ve Ukrainada tutulğan Rusiye vatandaşlarınıñ azat etilüv meselesini muzakere etecekmiz. Azatlıqtan marum etüv yerlerinde bulunğan ayrı vatandaşlarnıñ tibbiy ya da diger yardımnı temin etüv gumanitar meselelerini al etüv imkânlarını laf etecekmiz», – dep aytıla haberde.
Moskalkova da Ukraina zenaatdaşınen Kyivde körüşkenini haber ete.
«Memleketlerimizniñ prezidentleri arasında dialog olğanı pek müim, bizler ombudsmenler olar belgilengen kursta areket etip, gumanitar saada işbirligimizni inkişaf ettiremiz», – dep aytıla Rusiye ombudsmeniniñ haberinde.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
