Link açıqlığı

Saatnıñ esas haberi

Denisova ukrainalı askerlerniñ qoranta azalarınen beraber Moskvağa keldi


Ukraina ombudsmeni Lüdmila Denisova Moskvağa trennen keldi
Ukraina ombudsmeni Lüdmila Denisova Moskvağa trennen keldi

Ukraina ombudsmeni Lüdmila Denisova Qırım yalısında FSB tarafından zapt etilgen ukrainalı askerlerniñ qoranta azalarınen beraber Moskvağa keldi. Bu aqta o Facebookta bildirdi.

«Mennen beraber oğlanlarımıznıñ ailelerinden dört kişi keldi, qalğanları üyleden soñ kelecek», – dep yazdı Denisova.

Onıñ bildirgenine köre, o, askerlerniñ tuvğanlarınen beraber yanvarniñ 15-nde Rusiye FSBsiniñ zapt etilgen ukrainalı askerlerniñ sıñırlav tedbirini uzatmaq muracaatı baqılacaq Lefortovo mahkemesiniñ oturışuvına kirmege tırışacaq.

Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG