Ukraina Yuqarı Radasınıñ insan aqları vekâletlisi Lüdmila Denisova Qırımdaki Rusiye mahkemesiniñ «Ukraina milliy batalyonında» iştirak etkeninde qabaatlanğan Mecit Ablâmitovğa qarşı ükmüni «qırımtatarlarnı siyasiy sebeplerden taqip etüv» ve «repressiyalar» dep adlandırdı.
Bu aqta Denisova Telegram kanalında yazdı.
«Cinaiy dava sahte, mahkeme qararı ise sebepsizdir, dep qayd etem. Tahqiqat vaqtında sorğularda Mecit Ablâmitovdan bütün şaatlıqlar FSB hadimleriniñ basqısı altında alınğan edi», – dep aytıla haberde.
Denisovanıñ qayd etkenine köre, «işbu batalyon davasınıñ sahte qabaatlavları esasında Qırımda beş Ukraina vatandaşı qanunsız şekilde mahküm etildi – Edem Kadırov, Fevzi Saganci, Dilâver Gafarov, Nariman Mejmedinov, Aydın Mamutov».
Rusiye kontrolindeki Qırımnıñ İçki rayon mahkemesi martnıñ 23-nde Mecit Ablâmitovnı Rusiye Ceza kodeksiniñ 208-inci maddesiniñ 2-nci qısmına istinaden Noman Çelebicihan batalyonında iştirak etkeninde qabaatlap, 6 yılğa sert rejimli koloniyada qalmasına ve azatlığınıñ 1 yılğa sıñırlanmasına üküm etti. Qabaatlav tarafı Ablâmitov içün 8,5 yıl apis cezası berilmesini istegen edi.
2020 senesi avgustnıñ 19-nda Rusiye FSBsi «ukrain milliy batalyonında» iştirak etkeninden şübheli sayılğan Qırımnıñ İslâm Terek rayonınıñ sakinini tuttı, dep bildirdi. İslâm Terek rayonınıñ sakinine qarşı cinaiy dava açıldı. Al-azırda şübheli tutuldı. FSB, qırımlı 2016 senesi esas Ukrainağa ketip, «Lenur İslâmov qurğan N.Çelebicihan batalyonına» kirdi, dep bildire.
Qırım Muhtar Cumhuriyetiniñ prokuraturası «Noman Çelebicihan göñülli qırımtatar batalyonında» iştirak etkeni içün Ukraina vatandaşınıñ qanunsız tutuluvı ve evinde tintüv keçirilüvi boyunca cinaiy tahqiqat başlattı.
Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.
