Ukraina Yuqarı Radasınıñ insan aqları vekâletlisi Lüdmila Denisova fevralniñ 12-nde işğal etilgen Qırımnıñ memuriy sıñırındaki «Çonğar» keçiş noqtasında monitoring keçirdi ve siyasiy mabüs qırımtatarlarınıñ advokatları ve ömür arqadaşlarınen körüşti, dep bildirdi.
Bu aqta Facebook saifesinde yazdı.
«Teşkerüv vaqtında Rusiye işğalci akimiyeti qanunsız tutqan qırımtatarlarnıñ advokatları ve ömür arqadaşlarınen körüştik. Olar vatandaşlarımıznıñ sağlıq vaziyeti aqqında tafsilâtlıca tarif etip, tuvğanlarınıñ tez vaqıtta azat etilmesine yardım etmemni istediler. Bütün ukrainalı siyasiy mabüsler içün er kün küreşem ve olarnı mümkün olğanı qadar tez qaytarmaq içün elimden kelgenini yapacam, dep qayd ettim», – dep aytıla haberde.
Denisovanıñ qayd etkenine köre, monitoring vaqtında o, memuriy sıñırdan keçken insanlarnıñ aqlarına riayet etilgenini baqtı ve keçiş noqtasında vatandaşlarnıñ vesiqaları nasıl baqıla, şahsiy eşyaları ve naqliyat vastaları nasıl teşkerile ögrendi.
Yanvar ayında Ukraina ombudsmeni Rusiyede ve vaqtınca işğal etilgen Qırımda tutulğan qırımtatarlarnıñ advokatlarınen körüşti. O vaqıt «işğalci akimiyet tarafından tutulğan» qırımtatarlarnıñ qorantalarınıñ içtimaiy-turmuş meseleleri muzakere etildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
