Ukraina Yuqarı Radasınıñ insan aqları vekâletlisi Lüdmila Denisova, Rusiye ombudsmenine muracaat etip, Qırımda ve Rostovda apiske tutulğan qırımtatarlar Cemil Gafarov ve Yaşar Şihametovğa tibbiy yardım kösterilmesi içün tedbir almalarını rica etti, dep bildirdi.
«II derece saqatı Cemil Gafarovnıñ hronik hastalıqları ağırlaştı – 4-ünci derece büyrek yetersizligi, yürek hastalığı ve digerleri. Bir yıldan berli kerekli tibbiy yardım alamay, SİZO tibbiy bölügine muracaatları ise körmemezlikke urıla ve cevapsız qala. Semetdeşimiz büyük ağrı is ete ve çekişe», – dep bildire Denisova.
Onıñ malümatına köre, Yaşar Şihametov da büyrekleri ağırğanını şikâyet ete.
«O, bir qaç kere ekimni çağırğan edi. Baqıldı, lâkin ne diagnoz, ne tedaviylev belgilenmedi», – dep aytıla Ukraina ombudsmeniniñ haberinde.
Onıñ qayd etkenine köre, o, Rusiye zenaatdaşı Tatyana Moskalkovağa muracaat etip, Cemil Gafarov ve Yaşar Şihametovnıñ aqları ğayrıdan tiklensin dep, «kerekli tedbirlerni acele almasını» talap etti.
«Rusiye Baş prokurorına muracaat etip, Rusiye Ceza kodeksiniñ 124, 124.1, 125 maddelerindeki cinayet işlegen, hususan qanunsız tutulğan Ukraina vatandaşlarına tibbiy yardım köstermegen vekâletli insanlarnı cinaiy mesüliyetke çekmege talap etem», – dep haber ete Denisova.
Rusiye Baş prokuraturası ve Moskalkova Ukraina ombudsmeniniñ muracaatına cevap bermediler.
Martnıñ 17-nde Kreml kontrolindeki Aqyar şeer mahkemesi «Hizb ut-Tahrir teşkilâtında iştirak etkeninde» qabaatlanğan Yaşar Şihametovnı aprelniñ soñuna qadar apiste qaldırdı. Şihametov 2021 senesi fevralniñ 17-nde keçirilgen tintüvlerden soñ tutuldı.
Fevral ayında haber etilgenine köre, apiske alınğan qırımlı Cemil Gafarov Rostov-na-Donu SİZOsında kritik alda buluna. 2020 senesi avgust ayında, Gafarov Aqmescit SİZOsında bulunğanda, Qırım ve Aqyardaki Cezalarnı yerine ketirüv federal hızmetiniñ idaresi ekim onıñ sağlıq vaziyetini taqip ete, dep bildirgen edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 insan tutuldı. Cemil Gafarov da olardan biri ola. Aqmescitniñ Kiyev rayon mahkemesi episini apiske aldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
