Ukraina Yuqarı Radasınıñ insan aqları vekâletlisi Lüdmila Denisova Rusiye insan aqları vekâletlisi Tatyana Moskalkovağa muracaat etip, Bağçasaraydaki ekinci «Hizb ut-Tahrir davasınıñ» mabüsi Edem Smailov ve Aqmescitteki ekinci «Hizb ut-Tahrir davasınıñ» mabüsi Şaban Umerovnıñ tibbiy tedqiq yapılmasına yardım etmesini rica etti. Ukraina ombudsmeniniñ malümatına köre, mabüslerniñ sağlıq vaziyeti pek fenalaştı.
Bu aqta o, Facebook saifesinde yazdı.
«Rusiye insan aqları vekâletlisi Tatyana Moskalkovadan Ukraina vatandaşları aqlarınıñ bozuluvına emiyet berip, olarnı ğayrıdan tiklemek içün acele tedbir almasını talap etem. Hususan eki Ukraina vatandaşınıñ tolu tibbiy tedqiqi ve acele ihtisaslı ekim yardımı kösterilmesini talap etem», – dep aytıla haberde.
Denisova halqara aq qorçalayıcı teşkilâtları ve missiyalarınınıñ vekillerine muracaat etip, qanunsız tutulğan Ukraina vatandaşlarınıñ aqlarını ğayrıdan tiklemek içün tedbir almağa ve olarnıñ bozuluvına yol bermemege rica etti.
Hatırlatamız, fevralniñ 26-nda advokat Nazim Şeyhmambetov Edem Smailov ve Şaban Umerovnıñ sağlıq vaziyeti fenalaştı, dep bildirdi.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi martnıñ 27-nde Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal tutuldı. Olardan biri Şaban Umerov aldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
