Ukraina Yuqarı Radasınıñ insan aqları vekâletlisi Lüdmila Denisova bildirgenine köre, Rusiye ombudsmeni Tatyana Moskalkovadan apiske alınğan qırımlılarnıñ tutuv şaraitlerini teşkermek içün işğal altındaki Qırım ziyaretinen bağlı muracaatına cevap daa berilmedi.
Bu aqta Denisova yanvarniñ 15-nde BM Ukraina Monitoring missiyasınıñ yolbaşçısı Matilda Bogner ile körüşüv vaqtında ayttı.
«Vaqtınca işğal etilgen Qırımda, hususan Aqmescit SİZOsında ve tüzetüv koloniyasında tutulğan Ukraina vatandaşlarını ziyaretimnen bağlı vaziyetni ayrıca muzakere ettik. Bu mesele boyunca Rusiye insan aqları vekâletlisi Tatyana Moskalkovadan daa cevap almağanımnı bildirdim», – dep aytıla Ukraina ombudsmeniniñ Facebook haberinde.
Rusiye prezidenti insan aqları vekâletlisiniñ saytında bu aqta bir malümat yoq.
Bıltır dekabr ayınıñ soñunda Denisova Moskalkovadan cevap aldı, dep bildirgen edi. Anda Rusiye ombudsmeni Rusiye Cezalarnı yerine ketirüv federal hızmetinden razılıq almaq içün mektüp yollağanını bildirdi.
Rusiye Cezalarnı yerine ketirüv federal hızmeti Ukraina ombudsmeniniñ malümatını izaatlamadı.
İyülniñ başında BM insan aqları Yuqarı komissarı Michelle Bachelet Qırımdaki insan aqları vaziyetine dair maruzanı taqdim etip, yarımadada işkence qullanıla ve söz serbestligi sıñırlanıla, dep bildirdi.
