Ukraina Yuqarı Radasınıñ insan aqları vekâletlisi Lüdmila Denisovanıñ bildirgenine köre, Aqyardaki «Hizb ut-Tahrir davasınıñ» mabüsi Ferat Sayfullayev Rusiye koloniyasından azat etilse de, aqqı ve serbestligi 8 yıl devamında sıñırlı olacaq. Bu aqta o, Telegram kanalında yazdı.
«Qırımtatarı Rusiye koloniyasında 5 yıl qanunsız tutuldı. Faqat, azat etilgenine baqmadan, Ukraina vatandaşınıñ aqqı ve serbestligi 8 yıl devamında sıñırlanacaq. Rusiye mahkemesiniñ Ferat Sayfullayevge qarşı çıqarğan qararına köre, memuriy nezaret olacaq, areketi sıñırlanacaq ve yaşağan yerini serbest saylap olamaycaq», – dep qayd etti o.
Bundan ğayrı, Denisovanıñ malümatına köre, Rusiye uquq qoruyıcılarınıñ izni olmasa, Sayfullayevniñ işğal etilgen Qırımnı terk etmesi yasaqlana.
«SARS-CoV-2Z sebebinden başlağan COVID-19 keskin nefes hastalığı tarqalğanda Rusiyede ve vaqtınca işğal etilgen Qırımda qanunsız tutulğan Ukraina vatandaşlarını tez azat ettirmek içün halqara toplulıqnı Rusiyege qarşı basqı quvetleştirmesine çağıram», – dep qayd etti ombudsmen.
Qırım.Aqiqatnıñ daa evel bildirgenine köre, Aqyardaki «Hizb ut-Tahrir davasınıñ» üçünci mabüsi Ferat Sayfullayev Rusiye koloniyasından azat etildi.
Yanvar ayında berilgen malümatqa köre, Aqyardaki «Hizb ut-Tahrir davasınıñ» mabüsi Rustem Vaitov Rusiye apsinden azat etildi. Daa soñra Aqyardaki «Hizb ut-Tahrir davasınıñ» mabüsi Nuri Primov azatlıqqa çıqtı.
2016 senesi sentâbr ayında Rostov-na-Donu şeeriniñ Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davası» boyunca qabaatlanğan aqyarlılar Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
