«Ukrain diversantları davası» boyunca mahküm etilgen Volodımır Dudkanıñ sağlıq alı zayıflaştı. Bunı Ukraina Yuqarı Radasınıñ insan aqları vekâletlisi Lüdmila Denisova haber etti.
«İşğalci Devlet tarafından qanunsız sürette 14 yıl apis cezasına mahküm etilgen Ukraina vatandaşı Volodımır Dudkanıñ sağlıq alı bayağı zayıflaştı. Volodımır bir ay devamında cezahaneniñ tibbiyet bölügindedir. Antibiotikler yardım etmey. Bedeninde tökme, irinli yaralar çıqtı. Bundan ğayrı Volodımırnınh aşhazan hastalığı bar, yüksek qan basımı sebebinden başı ağıra», – dep yazlı Denisova.
Onıñ sözlerine köre, Volodımır Dudkanıñ tuvğanları kerekli ilâcalarnı oña ayda tek bir kere yiberip olalar.
Denisova Ukraina ombudsmanı Tatyana Moskalkovadan delal çereler körmege ve karelki tibbiy yardım kösterilmesini talap etti.
«Dünya toplulığını, diplomatlarnı ve uquq qoruyıcı teşkilâtlarnıñ temsilcilerini alâ daa işğalci devletniñ apsinde bulunğan Ukraina vatandaşlarınıñ aqlarına riayet etilmesini nezaret etmege çağıram», – dep qayd etti o.
2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.
Rusiye kontrolindeki Aqyar şeer mahkemesi aprelniñ 4-nde «ukrain diversantları» davasınıñ» mabüsleri Vladimir Dudka ve Aleksey Bessarabovnı 14 yılğa üküm etti. Mahkeme er birine para cezasını da berdi: Dudkağa – 350 biñ ruble, Bessarabovqa – 300 biñ ruble.
Oktâbr 15-inde Rusiye Yuqarı mahkemesi imayeniñ şikâyetini red etip, Dudka ve Bessarabovnıñ ükmüni tasdıqladı.