Ukrayina Yuqarı Radasınıñ insan aqları vekâletlisi Lüdmila Denisova Qırımnıñ Rusiye akimiyetiniñ Bağçasarayda Sauskan musulman mezarlığınıñ yerinde eglence parkını qurmağa planlarına qarşılıq kösterdi.
"Qırımnıñ tamır qırımtatar halqınıñ adetlerine, ananelerine ve medeniyetine emiyet bermeyip Bağçasaraydaki qadimiy mezarlıqnıñ yerinde tecavuzcı istiraat zonasını quracaq ola. Qırımtatarlar öz degerlikleri oğrunda küreşmege devam eteler, işğalcilerge qurucılıqnıñ toqtatılmasın talap etip mektüpler yazalar, amma nafile. Ukrayina vatandaşları parknıñ yaratılması içün topraq işleriniñ ve mezarlıqnıñ qırımtatarlarnıñ din ve adetlerine zıt olğan eglence yeri kibi qullanuvınıñ acele toqtatılmasını talap eteler", - dep yazdı Denisova Facebook saifesinde.
Denisovanıñ sözlerine köre, Rusiye akimetiniñ bu kibi areketleri "Silâlı çatışma zamanı zamanı medeniy servetlerniñ mudafaası aqqında Gaana şarnamesiniñ 4 ve 5-nci maddelerini bozulmasıdır".
Bundan ğayrı, o, BMT-nıñ Rusiyeniñ Ukrayinağa arbiy istilâsı zamanı İnsan aqlarınıñ bozulması üzre Araştırma komissiyasını "Rusiyeniñ Ukrayinada insan aqlarınıñ bozulması ile bağlı bu faktlarını nezaretke almağa" çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
