Ukrainanıñ Rusiyege Bergen deñişim cedvelinde qırımtatarlar da bar, dep bildirdi Ukraina Yuqarı Radasınıñ insan aqları vekâletlisi Lüdmila Denisova. Onıñ aytqanına köre, olarnı azat etmek içün iş devam ete.
Bu aqta Ukraina ombudsmeni BBC News Ukraina intervyüsında bildirdi.
«Biz bular ukrain, bular ise qırımtatarlar, dep bölmeymiz. Olar Ukraina vatandaşları ola ve cedvelde barlar. Er kesni tüşünemiz», – dep qayd etti Denisova.
O, Ukraina ve Rusiye arasında tutulğan şahıslarnı deñişimniñ nevbetteki basamağınıñ kününi ve diger tafsilâtlarını aydınlatmadı.
«Bu aqta bir şey aytıp olamayım. Bir şey yapacaq olsañ, tınçlıq kerek, deyler de. Çoq şey aytıldı, yalan haberler oldı. Bir şey aytmağanda ise deñişim kerçekleşti. Şimdi de öyle yapmaq kerek, dep tüşünem», – dedi ombudsmen.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı.
Ukraina prezidenti Volodımır Zelenskıy Qırım.Aqiqatqa izaat berip, Rusiyede apiste tutulğan qırımtatar faalleriniñ azat etilüvi Ukraina-Rusiye almaşuvınıñ ekinci basamağı olacaq.
Qırımtatar Milliy Meclisiniñ reisi Refat Çubarovnıñ fikirince, Rusiye, «ukrainalı siyasiy mabüslerni azat etüv dialogınıñ er angi şeklinde» işğal etilgen Qırımnen bağlı er şeyni red etmege tırışa.
Ukraina Yuqarı Radasınıñ insan aqları vekâletlisi Lüdmila Denisovanıñ soñki malümatına köre, Rusiye öz toprağında ve işğal etilgen Qırımda daa 110 Ukraina vatandaşını apiste tuta.
