Ukraina Yuqarı Radasınıñ insan aqları vekâletlisi Lüdmila Denisova, Rusiyede ve vaqtınca işğal etilgen Qırımda qanunsız tutulğan ukrainalı siyasiy mabüslerniñ qorantalarınen şahsen ve online körüşti, dep bildirdi. O, Rusiye ve Ukraina arasında tutulğan şahıslarnı deñişim muzakereleriniñ hususiyetleri aqqında tarif etti.
«Şübhesiz, tuvğanları ne vaqıt evde olacağını eñ çoq soradılar. Vatandaşlarımıznıñ azat etilüvinen bağlı muzakereler devam ete, dep bildirdim. Bu esnasnıñ hususiyetleri aqqında malümat berdim. Aynı vaqıtta al-azırda Kreml esirleriniñ tuvğanları ve muzakereler esnasına celp etilgen resmiy Ukraina tarafınıñ vekilleri arasında bağ qurulmalı, dep qayd ettim», – dep yazdı Denisova Facebookta.
Ombudsmenniñ aytqanına köre, o, qorantalarnen Rusiye qanunsız tutqan bütün vatandaşlar içün devlet uqukiy yardım meselesini muzakere etti.
«Al-azırda esirlikte olğan er bir ukrainalı böyle yardımnen temin etilsin dep, elimden kelgenini yapacam, dep işandırdım», – dep bildirdi ombudsmen.
Denisovanıñ qayd etkenine köre, Ukraina prezidenti ofisiniñ işçi gruppasına ukrainalı siyasiy mabüslerniñ qoranta azaları kirsetilsin, dep añlaştılar.
Kremlniñ işğal etilgen Qırımda ve Rusiyede tutqan ukrainalılarnıñ azat etilüvinen bağlı muzakereler toqtamayıp keçirile, dep bildirdi aprelniñ 30-nda Ukraina prezidenti Volodımır Zelenskıynıñ matbuat kâtibi Yuliya Mendel Qırım.Aqiqatqa.
Aprelniñ 16-nda Donbasta daa bir deñişim kerçekleştirildi. Berilgen malümatqa köre, deñişim Ğorlivka civarındaki «Mayorsk» keçiş noqtası rayonında oldı, 19 Ukraina vatandaşı qaytarıldı. Prezident ofisiniñ qayd etkenine köre, Qırımda ve Rusiyede tutulğan ukrainalılarnıñ azat etilüvinen bağlı muzakereler devam ete.
Volodımır Zelenskıynıñ aprelniñ 17-nde bildirgenine köre, Rusiye ile deñişimni koronavirus sebebinden «buzlatmağa» teklif etilgen edi. Prezidentniñ aytqanına köre, «teşkerüvden» soñ bir deñişimde yigirmi insannı da, atta «bir insan yerine birini» deñiştirmege azır.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
