Qırımda apiske alınğan qırımtatar faali Edem Bekirovnıñ sağlıq vaziyeti – kritik.
Bu aqta Ukraina Yuqarı Radasınıñ insan aqları vekâletlisi Lüdmila Denisova Facebook saifesinde yazdı.
Aynı vaqıtta, Rusiye prezidentiniñ mesleatçısı, Rusiye prezidenti yanındaki vatandaş cemiyeti ve insan aqları Keñeşiniñ reisi Mihail Fetodovdan kelgen malümatqa köre, siyasiy mabüsniñ alı bir qarar.
«Advokatnıñ aytqanına köre, alğan vesiqada olğan hastalıqlar arasında ağır ve apiste tutulmasına mania olğan soyları yoq, dep qayd etile. Lâkin bilemiz ki, Edem Bekirovnıñ bir sıra telükeli hastalığı bar, SİZO şaraitlerinde olar tek daa beter ola bile. Daa bir kere emin oldım ki, Rusiyeden kelgen mektüplerdeki malümatqa inanmağa olmay», – dep yazdı Denisova.
Onıñ aytqanına köre, Rusiye Bekirovnıñ kerçek sağlıq vaziyetini gizley ve insan aqlarını boza.
«Soñki muracaatımda Ukraina vatandaşına mahsus tibbiy müessisede kerekli tibbiy yardım kösterilmesi içün acele tedbir almağa rica etken edi. Qayd ettim ki, Edem Bekirovnıñ SİZOda tutulması ayatı içün telükeli aqibetlerge ketire bile», – dep qayd etti ombudsmen.
Daa evel Bekirov ilk tahqiqat çerçivesinde belgilengen psihologik-psihiatrik ekspertizadan keçti, dep haber etilgen edi.
Qırımda tevqif etilgen qırımtatar faali Edem Bekirov «Qırım birdemligi» areketiniñ koordinatorlarından biri Server Mustafayev ile SİZOda aynı kamerada qala.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı.
O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Ukraina Tış işler nazirligi mahkemeniñ qararına qarşı «sert narazılıq» bildirdi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Yanvarniñ 15-nde Bekirov Aqmescit SİZOsından Semaşko Cumhuriyet hastahanesiniñ endokrinologiya bölügine tibbiy teşkerüvge avuştırılğan edi. Yanvarniñ 18-nde Ukraina Yuqarı Radasınıñ insan aqları vekâletlisi Lüdmila Denisova Bekirov hastahaneden çıqarılıp, Aqmescit SİZOsınıñ mahsus blokuna yollanıldı, dep bildirdi.
