Ukrainada Rusiye ile esirlerni deñişmege azırlar. Bu aqta Ukraina ombudsmeni Lüdmila Denisova Moskvada bildirdi.
«Añlaşmalar esnası devam ete. Minsk formatında, norman formatında Parijde prezidentlerniñ mesleatçıları körüşti, bundan soñ prezident ofisiniñ reber muavini deñişüv niyetleri bar olğanını bildirdi. Rusiye insan aqları vekâletlisi ile tutulğan şahıslarnıñ cedvellerini deñiştik ve biz bu meseleni gumanitar uquq, halqara gumanitar normaları ceetinden azırlaymız. Biz azırmız», – dep qayd etti Denisova.
Ukraina ombudsmeni Denisova Moskvağa apiste tutulğan ukrainalı esir deñizcilerniñ apis müddetini uzatuv mahkemesine keldi.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
