Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovadan Qırımda apiske alınğan Ukraina vatandaşlarınıñ doğru pasport malümatlarını bermesini talap ete. Bu aqta Ukraina ombudsmeniniñ matbuat hızmeti haber ete.
Denisovanıñ aytqanına köre, «Rusiye vaqtınca işğal etilgen Qırımda Ukraina vatandaşlarını qanunsız şekilde tutmağa devam ete, Ukraina vekâletli organlarına ise resmiy malümat bermey».
Onıñ aytqanına köre, laf Rusiye FSBsi tutqan Noman Çelebicihan «qırımtatar batalyonında» iştirak etkeninde qabaatlanğan Aqmeçit rayonınıñ sakini ve Azaq deñizinde Zaporijjâ vilâyetinden dört balıqçı bulunğan gemi aqqında kete.
Qırım ve Aqyardaki Rusiye FSBsiniñ idaresi fevralniñ 15-nde Azaq deñizinde dört Ukraina vatandaşı bulunğan gemi tutulğanını bildirdi. Rusiye quvetçileri Sergey Goga, Aleksey İvanov, Vasiliy Türkeci ve Maksim Terehovnı tuttı.
Fevralniñ 16-nda Rusiye kontrolindeki Keriç şeer mahkemesi fevralniñ 15-nde Azaq deñizinde «qanunsız balıq tutqan» ukrain balıqçıdarını 10 künge apiske aldı.
Rusiye FSBsi fevralniñ 17-nde işğal etilgen Qırımda «N.Çelebicihan qanunsız silâlı batalyonında iştirak etkeninden» şübheli sayılğan Aqmeçit rayonınıñ sakinini tuttı, dep bildire. Er adam apiske alındı. Qırımtatar faalleriniñ malümatına köre, tutulğan kişiniñ adı – Nariman Nejmudinov.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi
